光榮冰室 (兆和街)

营业中

休息中

呢间茶餐厅一直都想帮衬，除左因为见人话食物好味之外，最重要系有一位良心、有勇气既老板😍。佢讲左我唔敢讲既野，做左我唔敢做既野，而我只能够帮衬佢，道出我对佢既支持、鼓励同感谢。星期五晚上6:30，餐厅已经爆场😮，门外亦有几位客人等位，同附近无人排队既餐厅形成对比。由于当日天气比较热，所以无点到煲仔饭，但见到在场人士食，其香气及饭焦，都令人垂涎!! 下次黎一定一定要点煲仔饭!!😏同朋友两个点左餐厅人气碟头饭，叉烧炒蛋饭同葱油煎鸡扒饭。本人好中意食d色水较深既食物，所以呢块鸡扒好吸引我既目光。鸡扒大大块盖过哂d饭，而且好厚身，鸡皮煎炸到香脆，食落一d都唔油腻，不过肉质唔算嫩滑，系比较扎实既鸡肉。姜葱蓉同甜豉油有提味作用之余，亦为个饭添加湿度。叉烧炒蛋饭望落平平无奇，亦无鸡扒饭咁震撼同吸引，但原来一d都唔简单😯，唔怪得食客都话佢好味，要不停反兜。蛋色黄金、蛋味浓、嫩滑唔鞋，加上少许葱粒，绵上添花，叉烧即刻变成配菜😆。甜品以邪恶既西多士作结，大大件，啖啖花生香，面包软棉棉，好满足🤤。以上两个饭都系套餐包餐饮，但饮品沟得好稀，饮落好啖味🤐。虽然当晚好忙，但职员有礼貎、有笑容、做野快手有效率。