我是羔羊 義 羊腩火鍋專門店 (已結業)

抓住冬天尾巴系列之惊喜羊腩煲边炉店✨ 呢度既有得食羊腩煲，又可以食完加鸡汤变打边炉，而且两边都好有睇头，唔会话两头唔到岸，直情煲两头到哂岸添！先讲羊腩煲𠮶边，炆到超腍超入味，肥膏直情入口即溶，不过我自己重口味就会想佢再膻啲，但朋友就相反钟意佢唔会膻，另外仲有枝竹冬菇马蹄竹笋等配料，一路煲一路索哂啲羊汁真心正，仲有跟埋我至爱嘅腐乳酱添✨至于边炉方面，作为铜锣湾港岛旺区就算系楼上舖都依然觉得比出面平，美国Prime级牛小排，𠮶个木盆成只手臂咁长上枱已经哗咗声，咁都系卖二百六，另外同样系用巨型木盆装嘅封门柳拼牛脷就两旧水都唔洗，封门柳同牛小排两者相比有如两个极端，封门柳就系食个牛香同咬口感，牛小排就食个油脂香，至爱牛脷超薄切，渌十秒左右已经食得，其嫩口感完全系我杯茶✨另外仲有啲即食小食都意外地唔错，例如糖心皮蛋加咗酸甜子姜碎有够讨好；火锅配件芝心狮子狗就每粒狮子狗个窿塞啲芝士入去，望落流流地，但食落反而比吉边个芝心竹轮有过之而无不及😮 其实仲有唔少配料选择，只系错估牛肉份量冇谂过咁大盆，唔系都会想试多几款😂 话说虽然呢度系楼上舖装修一啲都唔IGable，系胜在够干净空气亦够流通，食咗成两粒钟