影片
更多
2016-08-16
15023 浏览
日本嘢久唔久都有食吓，其实，都几钟意同啲朋友一齐食放题，因为一个固定价钱任食有数围，但比起食自助餐又平一截，食物选择亦唔少，想食乜就点乜，各有所好，唯一喺漏单、时间紧嘅负面问题。但睇番近一年嘅食评，原来好耐无食过放题，对上一次已经喺旧年年尾嘅事，所以，抛出食放题嘅提议，实行大擦一场 。为咗减少漏单、时间紧嘅问题，食早啲喺不二法门，所以订6:00pm，预早睇定有咩食，分头剔点菜纸增加效率，就算限食到8:00pm，两粒钟食餐饭都差唔多，再者，越早客越少，漏单嘅问题相对都细啲 。餐厅占商厦全层，地方都几大，早到关系，只有一排座位被安排入座，不过，7:00pm已经满晒座，离开时，门口仲堆满客，多人到不得了 。一如所有放题，点菜纸分门别类放晌枱面，以小型档案簿钉住啲点菜纸，个人觉得分得太多张，而且，好容易有漏夹嘅问题。大部分食物由点菜纸落单，小部份食物如甜品及汽水、果汁、啤酒或热茶，可到专柜自取，而甜品及饮品两者嘅选择亦算得上多 。有一系列OKF果汁（其实喺韩国牌子嘢），有多款口味，我哋先后试咗芒果、菠萝、提子、桃，又几好饮㖞，里面仲有啲纤幼嘅果肉啜吓。个人最心水喺桃味，味道较为清甜，却
为咗减少漏单、时间紧嘅问题，食早啲喺不二法门，所以订6:00pm，预早睇定有咩食，分头剔点菜纸增加效率，就算限食到8:00pm，两粒钟食餐饭都差唔多，再者，越早客越少，漏单嘅问题相对都细啲 。
餐厅占商厦全层，地方都几大，早到关系，只有一排座位被安排入座，不过，7:00pm已经满晒座，离开时，门口仲堆满客，多人到不得了 。
一如所有放题，点菜纸分门别类放晌枱面，以小型档案簿钉住啲点菜纸，个人觉得分得太多张，而且，好容易有漏夹嘅问题。
大部分食物由点菜纸落单，小部份食物如甜品及汽水、果汁、啤酒或热茶，可到专柜自取，而甜品及饮品两者嘅选择亦算得上多 。
有一系列OKF果汁（其实喺韩国牌子嘢），有多款口味，我哋先后试咗芒果、菠萝、提子、桃，又几好饮㖞，里面仲有啲纤幼嘅果肉啜吓。个人最心水喺桃味，味道较为清甜，却带有浓郁桃香味 。
此外，更每位客人奉送一杯Movenpick雪糕一杯，4款口味供选择。
刺身 除咗日本玉子刺身外（你无睇错，佢真喺写「日本玉子」，称得刺身，即喺鱼生，有啲刺身已用牛肉、马肉，但玉子，即喺鸡蛋，但佢又唔喺俾只生蛋你，仲可唔可以叫鱼生呢？），其余10款海鲜都叫齐晒，样样两件，包括：三文鱼、油甘鱼、剑鱼腩、甜虾、深海大赤虾、鲍鱼片、马刀贝、赤贝、鲜带子及北海道角螺，装成一大碗两人份，睇落啲刺身色泽新鲜，非常吸引。试匀10款，同老婆都觉得整体啲刺身都有水准，尤其三文鱼、剑鱼腩、甜虾、鲍鱼片、马刀贝同北海道角螺，鲜甜出；反而，深海大赤虾口感太胶，鲜带子亦无够爽口，显得有少少失色。
寿司寿司类都有好多选择，无论一般嘅寿司、空运活鱼寿司、火炙寿司，都睇得见晌配搭上花咗唔少心思，不过，怕太易饱肚，又只得我俩公婆，所以，只选择试试几款创作寿司。
创作寿司 4款中试了其中的3款：矶の雪鱼籽酱带子、黄金胆中花之恋及豆纸香茅三文鱼沙律，配搭十分新颖，但味道普通。雪鱼籽酱配带子，集咸鲜香；加入海胆嘅花之恋，惊喜无预期大，夹起嚟散晒，食得有啲狼狈；反而豆纸香茅三文鱼沙律几得意，睇张豆纸个样好胶咁，入口软软哋，其实无乜味，而件寿司香茅味欠奉。
小食 豆腐及枝豆喺老婆心水，所以，胡麻冷豆腐及味付海带枝豆各点一客，再加一份酸姜过过口瘾，份冷豆腐真喺好滑，芝麻酱又香浓。
沙律 沙律类唔喺啲大大路嘅柚子沙律、中华沙律之类，5款沙律中有好几款都挺特别，想就梗想试晒啦，不过，两个人食得几多吖。结果，拣咗黑松露胡麻海鲜沙律及牛油果香草鲜虾沙律，难得两款都无迤做，沙律菜底好新鲜爽脆，而前者黑松露搭胡麻几OK㖞，浓香尽出，而后者香草味好突出，鲜虾亦爽弹，只恨佢牛油果少得可怜。
手卷、军舰、卷物平时去食日本嘢，依几类食物当然都会点啦，不过，去到放题，咁饱肚嘢就通常都放弃。虽然如此，其实睇番佢哋嘅选择，睇落又似乎唔错嘅，不过，无理由为樖树放弃个森林嘛。
炸物香口嘢当然啱啦，不过，6款炸物里，如黄金炸鸡、吉列炸带子、酥炸黑轮卷……等等，唔算好吸引到小弟，所以，亦都无点。
天妇罗 无食炸物，天妇罗就更加唔可以错过，当中几款天妇罗野菜，就更啱老婆，温室南瓜天妇罗、秋葵天妇罗、蕃薯天妇罗都喺佢嘅偏爱，南瓜、蕃薯都粉甜，秋葵爽口；虎虾天妇罗亦都不俗，全部入口都唔油，粉浆够薄。
烧物 基本上，烧物我哋都叫得唔少，不过，样样都喺逐串逐串嚟，结果发现佢哋喺储单出菜，未够有霸气咁一碟过嚟晒啲烧物。两张点菜纸，共有12款选择。
烧鸡翼、盐烧海虾、烧冬菇串、烧牛饼串属普通之选，唔喺话唔好食，只喺普普通通啫，当然，对鸡翼、海虾……等等有情意结就另计，而烧牛饼串似烧到干晒水嘅牛丸咁，不过，沾啲泰式酸辣酱又几OK㖞。
烧广岛蚝、盐烧多春鱼、烧有机鲜菠萝、烧鳗鱼串、烧有机日本蕃薯仔属美味之选，广岛蚝大只厚肉，加埋啲芝士、洋葱粒一齐焗，几好味；多春鱼劲多春，外皮几香脆；烧菠萝一向都好食，烧干少少水份，就更清甜；而鳗鱼串搽上照烧汁去烧，香浓惹味；蕃薯仔一口一粒，好粉好甜。
烧纽西兰香草羊鞍、盐烧牛舌属个人喜好之选，好唔好食在乎个人口味，羊鞍烧得焦香，既有香草味，又有点点羊膻香，肉质软腍富肉汁；牛舌烟韧，带股独有嘅牛舌燥味。
主食 依一类包括啲拉面、乌冬之类，寿司都无点试，超饱肚嘅拉面、乌冬就更加唔会嗌啦。不过，佢哋反而有两款汤品喺我哋都有兴趣，尤其老婆就最钟意饮汤。自家制立鱼汤，同点菜纸个样好唔一样，不过，总算几清几香，味道不过不失；反而个南瓜汤掂㖞，好浓南瓜味之余，口感顺滑。
和风料理、一品料理两款料理就犹如广东式小炒或小菜咁，若非人少，一定会点一客铁板雪花牛柳粒、雪花牛肉锅及龙虾海鲜粥嚟试试，担心太大份，尤其个粥，标明2-4人，真喺一客顶几份刺身啦，小弟仲想留少少肚食甜点，食甜点总会令人开心啲！
Movenpick雪糕 品牌始终喺唔牌，质素有一定保证。老婆拣朱古力，软滑香浓，内里仲有朱古力碎片；小弟拣意式奶冻，好重奶香味之余，拌入红桑莓酱，带点酸甜味，好食。
甜品 一口气搞攞晒咁多种类甜点，有朱古力饼、朱古力挞、马卡龙、绿茶奶冻、木糠布甸、意士多啤梨奶冻，质素唔会有咩好大惊喜，但都算中等偏上，尤其啲马卡龙，比预期中好，外层脆得嚟有点烟韧，甜得唔会太过份，唔甜就唔喺马卡龙啦，最麻麻喺啲朱力饼，朱古力味虽浓，但入口好干。
顺带一提，7:30pm前离座或9:30pm后入座有85折，就算8:00pm前离座亦都有9拆，依啲小小著数就到就尽量用啦，算喺变相唔收加一嘛。
头轮相对客少（都喺初段嚟讲），印像中都无咩漏单，喺有啲串烧拖到好尾先放嚟。而食物质素以咁嘅价位，又有咁多选择，称得为上算、抵食，此外，店员嘅招呼唔错，收碟勤快亦有礼，整体服务都几到位，7:00pm先叫埋单，但可以继续点、继续食，到7:15pm提你7:30pm喺截单时间，再到7:30pm又提你有咩想食可以把握时间落埋单。虽然，未至于抛嚿砖，引块玉返嚟，但「至尊满屋」的确喺间食得过嘅放题店 。
张贴
