協盛大排檔 (已結業)

打边炉，不外乎牛肉要靓，海鲜新鲜，如果加埋啲丸丸饺饺又好味，再加埋仲有出色嘅煲仔饭，再再加埋经济实惠，咁就真系冇得顶！喺天后嘅【协盛大排档】就几乎接近呢个要求！除咗环境……呢度位处铜锣湾街市附近横街，一到夜晚，成条街都系佢地霸晒，而我地坐嘅位置，就喺正隔离纸紥舖门口，喺我头顶，吊住一紥紥金银衣纸，正所谓…举头望衣纸低头滚鸡子尤其喺呢段万圣节期间，都可谓非常应节！先迈手切肥牛，一望已觉得对板，食过都尚算甘香，合格！再嚟花虾，够晒生猛，肉质够爽又鲜味，出色！ 一人一只蛏子皇，新鲜又冇沙，掂当！ 仲有自制虾丸，超级弹牙，极品！仲有墨丸鳝片炸鱼皮……样样都有返咁上下，唔怪得d枱摆满成条街！食到一半，虽然有少少饱饱地，但损友话一场嚟到，冇理由唔试埋个煲仔饭，试咪试！就叫个排骨煲仔饭，损友居然话不如加条腊肠，我就话不如晒冷，唔争在要埋润肠！结果一煲双肠排骨煲仔饭，令成枱人饱到上事业线！好满足！埋单一人二百二，呢餐边炉……认真抵打！