鮮一夜火鍋 (已結業)

今日朋友话带我去荃湾食好嘢， 去到火锅店， 已经好多人喺度食紧，朋友推介食呢个一夜皇御套餐。套餐做紧$268，除任食火锅，饮品任叫外，仲有即炒鸡煲、花胶鸡煲翅、鹅掌炆鲍鱼、五色刺身拼盘、安格斯肥牛肉、时令海鲜拼盘。鹅掌鲍鱼炆得好稔滑，鲍鱼虽然不是非常大只，不过以咁嘅价钱有咁多嘢食，都不敢苛求喇。花胶鸡煲翅花胶软滑，汤底香浓，非常滋润！鸡煲我哋拣咗少辣，侍应加上大量葱蒜、洋葱即场在我哋面前炒，香味攻到口水直流。五色刺身拼盘有帆立贝、赤虾、三文鱼、希灵鱼、带子， 大件夹新鲜。海鲜拼盘有花甲、鲜蚝、象拔蚌、贵妃蚌、鲜虾，花甲无沙，贵妃蚌同虾都好大只。安格斯肥牛以上系限量供应， 即系食完冇得添加 ，但系我食完鸡煲+ 花胶翅+鲍鱼鸭掌+刺身拼盘，都已经饱咗八成有多，之后拣咗个清清地嘅芫茜皮蛋汤底嚟灼牛肉同海鲜拼盘，另外再随便点咗数款火锅配料，就已经饱到食唔落喇！估唔到以咁嘅价钱，净系食佢供应嘅食物，已经回哂本喇！何况仲有咁多其他任你食嘅火锅配料㖭。其实仲有好多嘢想食，可惜个肚唔争气，连免费雪糕都食唔落，要等下次嚟，才可以尝试其他食物喇。