稻香 (藍天海岸) (裝修中)

送假同屋企人去稻香饮下午茶，贪佢所有点心（包括特点、大点、中点同小点）都有半价，好抵！三个叫咗好多点心🥳叉烧酥：好酥脆又热辣辣，一咬落去听到嗦嗦声，证明真系好脆，不过就有啲油。樱花虾薄罉：最中意食薄罉系因为佢烟烟韧韧，侧边又脆卜卜。但估唔到今次个薄罉咁真材实料，咁多樱花虾，好热、好香口好好味。叉烧肠：又系新鲜出炉，啲肠粉好滑，叉烧都算多。烧卖：好大粒爆晒汁，差啲辣亲个口。另外，鲜虾好爽口，好味。金钱肚：份量比想像中少，有50%都系垫底嘅芋头，不过啲芋头都好粉好入味。金钱肚啲一格格沾满咗啲沙嗲汁，辣辣哋好惹味。煎堆仔：芝麻味好香，出面个煎堆皮同入面啲芋头蓉都好热，两样夹埋好好食。凤爪排骨：唯一一个麻麻地好食嘅点心。凤爪无乜问题但啲排骨好膻。