Lockeroom Dining (朗晴坊) (已結業)

下午茶时段嚟到 Lockeroom Dining，食物比 lunch 时段平十蚊，兼且平日唔使加一，几抵食。先嚟个餐汤，就咁睇似好稀嘅杂菜汤，未饮之前不寄厚望，一啖入口，随即发现有惊喜：蕃茄味比想像中浓，底下嘅薯仔味都突出，唔错。至于个蒜香牛油法包都好正，不但厚切，面头铺上牛油同蒜蓉之余仲烘得微㶶，食落好滋味😋。主菜黑松露蘑菇海鲜炒饭最出色系个饭底，炒得粒粒分明之余，竟然仲有少许饭焦，劲有咬口，真心好食👍；配料方面， 菇类同三色椒都比海鲜多，不过由于黑松露味香浓嘅饭底实在太吸引，海鲜少啲都冇关系啦🤓。另一个主菜香辣蒜片罗勒意大利扁面则同想像有啲落差：首先佢劲少辣，反而偏甜😂；其次，我完全食唔出罗勒味，蒜味亦都非常轻微。由于成个意粉有唔少三色椒同洋葱，味道于是被呢啲配料主导咗，不过又唔代表佢唔好食嘅，我会评价为味道正常啦。