銀龍粉麵茶餐廳 (已結業)

两口子冇买𩠌煮晚饭,落雨C湿又唔想去太远,最好嘅选择就系落去屋企附近嘅银龙茶餐厅啦。以前喺旺角有一间超大间嘅银龙,但系𠮶时觉得佢好贵所以一次都冇帮衬过,但今时已经唔同往日喇,有番咁上下名气嘅茶餐厅而家普遍都系差唔多嘅价钱,所以知道屋企附近开咗一间都觉得可以为外食带嚟多一个选择。油塘呢间分店光线都好充足,地方够濶落,晚巿时间嚟都唔会太过多人,客人都系大约占半数座位,职员大部份都几勤力,唔会只系挂住睇电视或者吹水倾计,见到就算冇人点餐佢哋都好积极清洁地方同埋整理餐具,值得一赞 今晚想有啲米饭落肚,所以我就叫咗个西炒饭$52,阿肥就叫咗个铁板珍宝杂扒餐$85~ 佢份铁板餐睇落都几抵食,跟餐汤(罗宋汤)同埋法国牛角酥,主食可以拣配茄汁意粉,另外再包埋嘢饮(冻柠茶少甜)。个铁板有猪扒+牛扒+鸡中翼+火腿片+香肠同埋烟肉,份量都算多男士真系啱哂喇一定唔会唔够饱 而我个西炒饭亦都系超大碟,我食咗一半都够哂皮喇,剩番𠮶半都俾阿肥扫埋,个炒饭好足料,除咗蕃茄粒肠仔粒之外仲有虾同埋翠肉瓜粒,米饭都炒得够干身粒粒分明所以口感唔错,连阿肥都话啖啖放入口都有𩠌,冇渣流滩㗎另外我叫咗杯热咖啡,都几香同够滑,唔错。