越滿 (已結業)

今日去旺角大扫货，因为「思记outlet」清货，买六件有四折，爽呀！买完野揾野食，周围都好多人，最终嚟左洗衣街呢边，唔驶同人迫。经过越满，有八九成客，见价钱几平咁，就入去试吓。越满二人晚餐 A餐只系$178，B餐$298有七样嘢，样样都几鬼啱食㖞，要个B餐丫！出菜好快，隔左阵啲野就上晒枱。鲜虾米纸卷四件，合格水准。烧猪颈肉大碟，猪颈肉弹牙，都几好食。烧鸡半只呢碟做得几出色，厚肉，用香料腌左，就算唔蘸酱汁都已经好好食。外皮有啲脆皮，又好香香茅味，掂！咖哩软壳蟹唔好食，食唔出有蟹味，唔够热又唔够脆。炒芥兰苗好香口，够晒味。越式炒饭一大碟，好饱肚，但配料太少，用咖哩汁捞埋嚟食会好食啲。饮品两杯可以喺两页饮品list度拣，除左打X𠮶三款唔点得之外。一杯饮品散点都要三十几蚊，但跟餐都唔驶补钱，几抵。热咸柠檬水有半个咸柠。我就拣左最特色越式滴漏咖啡，浓浓咖啡味，底下有炼奶，但太甜！下次要叫少甜先得。六样野食加两杯野饮，都好大阵容。以为啲野食系细细碟，原来都几大份，系抵食既！