協奏坊西餐廳 (已結業)

情人节过后第三日拣咗呢间餐厅补祝，浪漫气氛就唔会有㗎喇，不过餐厅嘅装饰就充满新年气氛。餐厅唔太大，简单嘅设计，唔会太逼，空间感唔错。服务方面职员人手几充足，收碟快，有礼，而且自助区嘅碟拎上手仲系热同辣手，感觉干净。虽然地点唔太就脚，食物款式唔多，但味道都可以，质素平均，价钱方面真系抵，早15日订座，每位可享$298嘅优惠，三百蚊唔使，不过冷气好大全程都好冻。海鲜吧有面包蟹，蟹脚，龙虾仔，青口，蚬，虾。面包蟹质素系少有嘅好，啲膏同蟹肉一啲唔干唔硬。蟹脚肉多新鲜，咸淡适中。龙虾仔同虾都唔错，蚬同青口有啲淡。刺身只有三款，都可以嘅，寿司以自助餐嚟讲算系咁。前菜都几精致。鸡翼一般，大板烧同寿喜烧都受欢迎。猪鞍肉同西冷都好味，西冷颜色吸引，咬落一啲都唔韧，猪鞍亦系完全唔鞋。焗蚝好大只，不过缩得好劲，都可以。每枱会有一份豆腐海鲜锅羊腩煲嘅羊肉炆得唔错，不过汁唔够浓。咖喱鸡应该全部都系用鸡批，唔辣，椰香味重。牛油汁比目鱼个汁好味。黄豆猪骨汤同蕃茄汤。甜品味道一般。饮品有咖啡同果茶，右边系杨枝金露，见好多人都系杯装代替碗，我又有样学样。Movenpick雪糕有三款味，系自助形式，大球细球自己决定。