Domon 居酒屋 (淘大商場3期) (已結業)

呢排阿仔放暑假，凑佢上完兴趣班，例牌要食下午茶，有时五点半，我哋当埋晚餐。呢间次次佢首选，坐得入灯光有d昏暗，应该系情调来，不过大少唔识欣赏。佢次次要坐最出卡位，其实座位算宽敞，服务一般，有时发觉无嚟就提多次，食物快到，算好抵食。猪软骨叉烧拉面有盐味同味增汤底选择，大少选了盐味，汤底清清地，面质弹牙，猪软骨两大旧，一块大叉烧，肉算多，两款肉都淋，配上木耳，都算不错。吉列猪扒定食猪扒脆松脆可口，但略嫌细块，要提佢先有沙律酱，面豉汤唔咸，沙律菜有芝麻酱，仲有中华沙律，珍珠米粒粒分明，饭量足够。烧鲭鱼定食鲭鱼烧得好香，配有柠檬同烧汁，面豉汤内有海大和豆腐，沙律菜新鲜，仲有中华沙律，珍珠米粒粒分明，饭量足够。*所有餐配有饮品，可选汽水、柚子蜜、苹果汁、橙汁、或芒果汁。* 最近俾钱发现可加入WhatsApp做会员，会额外再有九折，所以好抵食。