泰國佬餐廳 (已結業)

家姐有朋友介绍咗呢间泰国餐厅俾我地，所以我地一家就揾咗晚嚟咗呢度食。呢间「泰国佬」位于广福道马路旁，好易揾。入面播住泰文歌同埋简简单单嘅装潢好有泰国嘅风味。小编觉得呢度嘅泰菜几适合香港人嘅口味，因为佢嘅辣度可以话啱啱好，有少少辣吊味又唔会辣得济而食到出晒汗。我地今次叫嘅嘢食大部份都系单点嘅，因为净系得小编想饮嘢，所以海南鸡饭就系跟餐咁嗌嘅。佢地嘅四人餐感觉无特别抵，只系有四杯野饮，而菜式都无得自选，所以我地就主要都系散嗌为主。我地嗌嘅菜式大部份都系好食又高质嘅，要特别介绍佢地嘅蒜蓉多士，虽然造型好似成旧砖头咁，但系食落去外脆内软，就咁食可以食到佢嘅蒜香同脆口嘅感觉，仲可以蘸青咖喱汁，一样咁夹。串烧稍微有啲过熟，少韧，有啲可惜。不过整体而言，四个人食都系六百几蚊，都几抵食嘅，大家可以叫少啲，好似我地咁样眼阔肚窄会饱得济。