冬蔭公公 (已結業)

今日一收工觉得好肚饿，正谂紧食咩好嘅时候，就谂起之前去冬荫公公饮𠮶杯龙眼冰。为咗杯足料龙眼冰，我就喺沙田站落一落车去咗冬荫公公度回味一番。四点左右去到，咁啱系下午茶时段，人唔算多可以即时入座。今次我就拣咗冬荫公汤底嘅汤河，而呢度有个好处就系冬荫公汤底可以随你个人喜好选择唔同嘅辣道。$42佢会包你一款嘅配料，但如果你要另加配料就每款$8。我今次嗌咗幼薯粉，虽然系下午茶，但份量唔少。幼薯粉嘅粗度比普通薯粉又幼大概三份二左右。个人觉得幼薯粉比正常粗度薯粉易夹，而且唔会容易因为难夹稳而将啲汤汁弹到自己。虽然比较幼身，但系都同样弹牙。冬荫公汤底酸酸甜甜再配合弹牙嘅薯粉，👍🏻。猪扒我就觉得稍为失色，唔热同较干身。下午茶餐本身唔包饮品，但系可以以优惠价去加配。我就加咗$9要咗个龙眼冰。呢杯龙眼冰嘅size有平时啲珍珠奶茶咁大杯，虽然啲龙眼肉并无我第一次饮嘅咁多，但系都比平时我喺其他地方饮嘅龙眼冰多果肉，而且杯嘢饮唔太甜，👍🏻👍🏻。用$51可以新城市附近食到个水准唔错又饱肚嘅泰式汤粉，值得有下次。