宴．鐡板燒 (亨環‧天后)

营业中

休息中

喺网上搜罗咗一啲Omakase嘅资料，见到一间楼上铺好特别，佢系铁板烧混合日式料理，今日抽咗啲时间嚟品尝一个特别嘅午餐。午餐头盘系日式刺身，好新鲜。之后系「日本北海道甜粟米」配「静冈温室蕃茄」作为前菜，呢味系冷盘，北海道粟米超级香甜，令人印象深刻。接着有油甘鱼寿司同埋鲷鱼寿司，师傅喺你面前即叫即做，好新鲜，好好味。跟住就系热盘，喺铁板烧之前，师傅会先俾你睇睇佢用嘅食材，今次有带子、大虾、和牛同埋鹅肝。烧带子配合三文鱼子同埋青酱一齐食，好鲜甜、好惹味。烧大虾，制作方法好特别，先取出虾头入边嘅虾膏，造成酱汁，再放返上虾肉上面，虾膏非常浓味，非常推介。香煎鹅肝配多士，鹅肝好香滑，外脆内软，入口即溶，配合多士，将多余嘅油分吸走，鹅肝入口唔会好油腻。而多士吸左鹅肝嘅油，亦都非常香脆好味。牛扒有两种煮法，第一种：香煎厚切牛扒，肉质鲜嫩，食到牛肉嘅鲜味。第二种：薄切牛扒，夹住葱花一齐煎，非常香嘅葱味，带出牛肉嘅鲜味，非常欣赏呢个煮法，真系一试难忘。结尾有面豉汤同埋炒饭，炒饭加入咗好多樱花虾，脆卜卜，用料十足，好香好好味。两个人都食到好饱好饱。午市套餐价钱合理，食物质素好高，性价比高，值得一试。