煜焙軒 (已結業)

行了半日山，最后都由深井搭返车出市区打边炉，今次试下呢间煜焙轩，就在旺角维景对面，因为店面有大大只招牌套餐，啱晒二人份量。而且出面就系巴士站，食完搭车返屋企好方便！我地5:30到，食早轮。$508的套餐A包了养生花胶鸡炖翅锅及一盘手切本地肥牛。上枱一刻有惊喜，因为花胶鸡锅好大锅，足有大半只鸡系锅入面，仲有冬瓜、蔬菜、虫草花及金华火腿片等，好足料。汤底好浓郁又清甜，店员提我地一定要饮汤先，然后再加汤打边炉。个汤真系好好饮，食到真材实翅，鸡肉嫩滑啖啖肉，好满足！唔打边炉真接当花胶鸡咁食亦无不可！但我地饮完汤食完鸡仲有好多汤剩，所以加汤就可以渌牛肉！额外点了蔬菜盘、墨鱼滑及大蚬等，份量都好足亦新鲜。手切牛肉味浓，入品又够肥美，直接落汤唔使点酱一样够味！肥猪造型的墨鱼滑质感爽滑，十分弹牙，仲有粒粒蟹子，食落带点卜卜脆，好有咬口！仲有大蚬，只只都肥美又无沙，好鲜甜。蔬菜盘份量又多，食菜都食得好满足。因为锅底浓郁，所以全程感觉似系用老火汤打边炉。作为一间唔系任食的火锅，煜焙轩算系交足了功课，价钱唔贵，份量足，加上位置方便，所以有不少捧场客。