北角四眼妹美食屋 (已結業)

今日成朝响北角忙忙碌碌，做完嘢又过咗食饭时间，谂住买啲轻便嘢返去食，经过呢间小食店几吸引，咖哩鱼蛋猪皮萝卜+豆浆都系$25。充满儿时回忆嘅小食好耐无食喇，望落见佢都几干净，就叫咗呢个组合外卖，店前有凳俾客人坐住等。等待期间睇吓仲有咩食，鸡蛋仔、格仔饼、点心、肠粉、烧卖、豆浆、果汁...都好多嘢食拣㖞。店员友善有礼，有问必答，原来豆浆系每天新鲜自制，有时系原味豆浆，今日就系黑豆浆，由于想提供最佳营养，所以保留少量豆浆渣，店员会提醒饮用时小心。 如果想响店前食都可以嘅，我怕热就拎走返公司食啦。个纸盒硬净又环保，打开盖就有好香嘅咖哩味飘出。里面有5 粒鱼蛋、 3 件白萝卜 、3 块猪皮。咖哩既浓且辣，好惹味。咖哩鱼蛋够入味，鱼味十足。萝卜够腍又入味拣选砂爆得够松嘅猪皮，出过水切得大大块再炆，口感爽软，索咗咖哩汁惹味又过瘾。豆浆有豆香，味道微甜，虽然有少少豆浆渣，但饮落都唔会哽喉。等食物嘅时候，见不停有客人买鸡蛋仔，有街坊熟客同店员边等边倾，下次要试吓佢啲鸡蛋仔/夹饼。