小城鎮 (已結業)

同大帝剪完头发就过来食饭，因为时间尚早唔使等位就入得，叫左个2人套餐B，有餐汤，沙律，小食，主菜，甜品，连西冷扒都唔使加钱要左1餐汤1沙律，汤系南瓜汤咸咸甜甜仲有未溶晒既南瓜几好饮，沙律菜加埋酸酸甜甜既汁同芒果好开胃。小食要左七味粉炸鸡脾菇，外脆内多汁，微微七味粉既香辣味唔错。主菜要左烧香草法国春鸡配炸鱿鱼圈，10oz安格斯西冷配薯条，西冷要左5成熟度刚刚好，煎完有摊抖足够时间唔会有血水渗出，肉质几嫩有汁👍👍粗薯条香脆好味。烧春鸡皮都几脆，肉都尚算软嫩，系胸位比较干，味道亦唔错。甜品要左1个草莓奶冻，1个时令鲜果奶冻，原本对餐甜品无期望，但几有惊喜，摆盘有花心思，奶冻香滑配埋果酱同生果一齐食好match。餐厅布置成怀旧火车站，收银位置好似售票处，连d灯都好特别好靓。有位瘦瘦既女侍应见到大帝用手攞面包沾汤食整污糟手即刻攞湿纸巾俾我地，好贴心亦有笑容。