京林屋 (明宮閣) (已結業)

非常抹茶控嘅我去到太古见到一间叫做《京林屋》，之前食过其他分店，今次试吓呢一间新开张嘅京林屋。餐厅装修简约，多以木为主，而且门面非常开阳，入到去店员就安排我哋坐沙发嘅位置。餐牌上实在太多选择，每一款都好想试吓。首先就叫咗热食嘅抹茶荞麦面，面嘅颜色系绿色，果然系用抹茶制造而成。食落去同其他面好唔同，烟烟靭靭嘅口感非常特别。之后就开始食甜品。首先当然叫我最钟意嘅抹茶半月布丁同埋香港限定芭菲。抹茶布丁好有质感，放上枱都弹下弹下，好得意，食落去抹茶同牛奶嘅味道刚刚好，唔会太苦，又唔会太甜。而芭菲绿茶雪糕真系非常正，食落去软绵绵嘅口感，而且非常丝滑嘅雪糕，再加埋入面嘅小丸子同埋脆可可片一齐食，非常满足呀。抹茶卷蛋糕食落去非常松软新鲜，中间仲有抹茶味cream，再配以红豆、小丸子同埋绿茶雪糕，好有份量啊。最后每人叫咗一杯饮品，分别系桃味焙茶同埋抹茶牛奶可以湿湿口。最后食咗咁多野都只系四百几蚊，而且全部都系来自日本最出名嘅抹茶系列，咁高质素嘅日式甜品，我哋下次要再试过其他食物。