八沢 (已結業)

呢排大食咗，我又著唔落25腰牛仔裤喇，但我哋始终系为食之人，绝食同食少啲对我哋嚟讲真系好困难，所以同M佬的起心肝去做Gym，做Gym之前当然要食少少少少少少嘢啦，一于简简单单食碗拉面乌冬，再上Gym room努力狂跑啦！呢间位于上环新纪元广场嘅拉面小店八沢 Hachi Sawa，好味到令我哋又唔觉意食多咗喇。黑松露忌廉海鲜乌冬：Creamy嘅乌冬真系罪大恶极，配合埋黑松露，我投降喇！乌冬完美地索晒啲汁，好弹牙又滑嘟嘟呀！海鲜方面有大量三文鱼同带子，份量十足。黑蒜炙烧极浓黑豚肉拉面：至于M佬嘅选择就系重口味嘅黑蒜油拉面，原煲上枱，碗都洗少只！猪骨汤底好浓郁呀，加埋大量炸蒜粒，蒜香味十足！溏心蛋够晒鲜滑，时间掌握得啱啱好！至于4片嘅灸烧极浓黑豚肉，烧得㶶㶶哋，唔油腻。明太子鸡翼：鸡翼去骨再酿入大量明太子，一啖咬落去，明太子就咇晒出嚟，微辣嘅明太子配脆卜卜嘅鸡翼，惹味又啖啖肉。厚烧牛舌串烧：牛舌厚切，香口又弹牙！串烧鸡肾：鸡肾烧到干身，有咬口又够腍！