影片
更多
2009-09-07
95 浏览
妈妈生日的大日子又到，今晚亦有公公婆婆在座，而香港做高级粤菜嘅地方愈来愈少，见米芝莲二星级嘅选择，而且好评如潮，应该唔会有差池，但事实往往事与愿违，究竟呢餐掂唔掂，过唔过到我屋企人嘅口? 都系我近来嘅格言，食过便知龙与鳯。楼下代客泊车嘅服务非常有礼貌，不失大酒店嘅服范，上到餐厅，知客亦醒目地为我地带位，呢间位于旺角朗豪酒店中菜部嘅明阁果真地方阔落，首先在出面有一个大厅系供散客食饭之用，而知客带我地去嘅另外两个大廰旁边都仲有好多个贵宾廰，相信要举行大小型宴会都冇问题。但系高质素嘅服务就在此时结束，跟住坐低就系讨论食咩𩠌，只系睇咗几分钟，侍应们就急不及待上前问需唔需要帮我地写几个𩠌，我地话唔需要，虽然醒目地攞多两个餐牌，只系隔几分钟就有另一个侍应嚟问需唔需要点菜，再过一分钟后相同嘅问题就轮到另一个发问，点解佢地要催客人点菜呢，呢种待客之道我真系从未在第二间酒店餐厅遇过。而且全晚当你需要侍应嘅时候，不单止冇人醒目地在你隔离出现，而且仲要周围一个侍应都冇，就算有，你举手超过一分钟亦唔会有人望到你，唔知佢地系唔够人手，定系真系咁忙。至于叫𩠌方面都唔系顺利，首先佢地嘅小食首选 (卥水猪仔脚) 卖
楼下代客泊车嘅服务非常有礼貌，不失大酒店嘅服范，上到餐厅，知客亦醒目地为我地带位，呢间位于旺角朗豪酒店中菜部嘅明阁果真地方阔落，首先在出面有一个大厅系供散客食饭之用，而知客带我地去嘅另外两个大廰旁边都仲有好多个贵宾廰，相信要举行大小型宴会都冇问题。但系高质素嘅服务就在此时结束，跟住坐低就系讨论食咩𩠌，只系睇咗几分钟，侍应们就急不及待上前问需唔需要帮我地写几个𩠌，我地话唔需要，虽然醒目地攞多两个餐牌，只系隔几分钟就有另一个侍应嚟问需唔需要点菜，再过一分钟后相同嘅问题就轮到另一个发问，点解佢地要催客人点菜呢，呢种待客之道我真系从未在第二间酒店餐厅遇过。而且全晚当你需要侍应嘅时候，不单止冇人醒目地在你隔离出现，而且仲要周围一个侍应都冇，就算有，你举手超过一分钟亦唔会有人望到你，唔知佢地系唔够人手，定系真系咁忙。
至于叫𩠌方面都唔系顺利，首先佢地嘅小食首选 (卥水猪仔脚) 卖哂，唯有改咗做牛展粒，另外原本点嘅汤 (海底椰川贝炖猪展) 又卖哂，改咗螺头汤，当时只系八点正，究竟佢地真系卖哂定系根本冇预备好足够材料。
1. 乳猪拼盘 双拼 $158 - 乳猪嘅皮同肉系分开摆，乳猪皮非常香脆，啲肉系切成条状的，同一块块皮嘅size唔同，欠缺口感；叉烧一睇就知新鲜，白雪雪嘅猪肉，不过唔系半肥瘦，而且表面蜜糖唔够兼烧得唔够香，美中不足。
2. 九制陈皮牛展粒 $78 - 因为冇咗招牌猪仔脚至改叫呢款菜，牛展质地唔错，但除非你独爱陈皮味道，因为陈皮汁味道非常强烈，再加埋陈皮丝，相信唔系人人可以接受，我地屋企由老中青三代都冇人顶得佢顺，唔明白侍应为何向我地推介呢款菜式。
3. 花旗参炖螺头汤 $280/窝 - 虽然落咗花旗参，但系一啲都唔会感觉苦味，反而因为加有螺头，再同瘦肉、鸡肉一齐煲，味道鲜甜无比，而且瘦肉仲夹有少少肥肉，汤渣都咁好食，水准之作。
4. 鳯朵咕噜肉 $128 - 冇多余嘅汁，酸甜汁味道调较刚好，炸桨亦都算薄，只系猪肉略嫌过瘦，未演绎出咕噜肉嘅神髓，整体上表现算中上，比出面其他嘅食肆处理得好。
5. 蟹肉北菇扒时蔬 $158 - 苋菜用上汤煮过，但煮得太熟太淋，唔止软身，而系淋身，毫无口感可言，虽然啖啖蟹肉，又有厚厚嘅冬菇，但系个芡汁则埋得过杰，失色失色。
6. 中式煎牛柳 $138 - 另一款怪味之作，有六块大而厚的牛柳，肉质韧兼实；茄汁嘅味道非常古怪，不同于一般中式牛柳嘅味道；配料亦觉奇怪，何解不放入洋葱条呢? 其实简简单单用上洋葱已经好味到不得了，竟然用上唔应该炸嘅蕃茄，就算要用都应该将之烤焗；另一配菜西兰花只系灼熟，但系加埋个茄汁根本怪味到不能入口。
7. 朗豪炸子鸡 $318/只 - 整只炸子鸡摆放得非常美观，好有气势，鸡皮超薄超脆，与肉之间一旧肥膏都冇，肉质亦鲜嫰，但系就唔够鸡味，而且味道亦过啖，好明显系如果鸡肉接近肚嘅位置就够味啲，如果系厚肉嘅地方，相信系腌唔够时间，就啖味到带唔出味道嚟，而且侍应亦忘记将淮盐上枱，只得豉油，莫名其妙。年耦片炸得香脆，又冇薯片咁腻，值得赞许。
8. 虾籽鲜菌麒麟斑 $398 - 荣获2003年度香港旅游发展局美食之最大赏金奖名菜，算系全晚有水准之作，斑球只系得六件，用油轻轻泡过，鱼肉内里仍保持水份，入口即散，师傅功夫到家；伴碟嘅小唐菜仲要修过啲边，非常讲究；再配上用虾籽炒鲜什菌，虾籽味道极度香浓，配合味道淡淡嘅鲜菌，异常绝配，但吃得多会略嫌咸。
9. 翅晶凝 $68 x 2 - 餐厅招牌甜品，净睇个名已经够哂气势，估唔到上枱一刻仲劲，每一客有四件，中间还放有一旧鲜芒果，四件甜品先用一个胶嘅器皿装住，再喺盒底放有干冰，营造出烟雾弥漫嘅感觉，视觉一流。每一件翅晶凝分成上下两层，上层有放入真鱼翅做成嘅啫喱，感觉特别，竟然比厨师谂到怎样将鱼翅加入甜品里面；下面有芒果布甸，唔系特别香滑，而且有啲硬添。不竟始终够哂卓头同创意无限，仲系一件名符其实嘅富贵甜品。
10. 白饭 - 特别报告事项，平时白饭应该不值一提，但今次就例外，事关南方人主要食粮系"米"，好多人每一餐甚至一定要有饭落肚。今晚嘅白饭出现严重问题，依家好多中菜馆嘅白饭都好好食，因为现在用嘅白米都好靓，而且餐厅日日都要煮饭，相信系一项熟手技术，偏偏呢餐嘅白饭系煮得过硬，令致每一道𩠌嘅感觉或多或少比啖饭影响到，算系一个好严重嘅技术错误。
Comments: 今个生日饭又未至于难吃，但系就只可以用中规中矩嚟形容，毫无惊喜可言，只可以话去一次都无妨，不过好难再有下次。佢仲话系被评为米芝莲二星级餐厅，可以嘅话，我至少要摘去一粒星。
张贴
