Story Steak & Pasta (已結業)

蘑菇汤和南瓜汤。好有心思咁喺上面用忌廉画咗植物嘅图案，增加咗颜色同视觉效果。当然艺术嘅嘢见仁见智，个人觉得味道比较重要。蘑菇汤好浓郁嘅香味，但就比较稀啲。南瓜就好香甜。蒜蓉多士。一面烘到焦香脆口，另一面就好松软，加埋蒜香味，好食。芝士薯角。劲大量软滑细腻嘅芝士，化解薯角嘅油腻热气感，芝士控最爱，美中不足薯角唔够脆口。香蒜辣椒带子意粉。未食已经闻到好浓嘅蒜香味，食落意粉嘅口感软硬恰到好处，有小小辣，原来落咗少许辣椒仔。烟肉嘅油份令意粉更滑，蘑菇嘅香味就丰富咗个味道。BBQ酱烤原条猪肋骨。大大条猪肋骨，份量绝对唔会令你失望。一上枱一阵烧烤嘅焦香味扑鼻而来。虽然肉质偏瘦，但食落好爽口，蘸埋酸酸地嘅BBQ酱汁食，加埋沙律菜，食完唔会有heavy嘅感觉。青苹果气泡茶。淡淡嘅青苹果香味好fresh，气泡解腻。薄荷朱古力。薄荷冰冰凉凉嘅感觉同朱古力一齐冇违和感，反而增加咗朱古力嘅香甜味。