芯 (已結業)

好耐冇出去食饭，难得夜晚唔使返工梗系出去chill下。呢间嘢轻食为主，都系俾人食下小食饮吓嘢倾吓计。所以我地都系叫啲小食为主。好似呢位唐扬炸鸡真系不得了。一切开真系超juicy，啲鸡仲系好嫩滑，再配埋呢个蜜糖芥末酱，真系超正。食日本嘢当然唔少得食软壳蟹，佢呢间嘅软壳蟹睇落好似大只好多。睇返佢个横切面真系好厚，唔会炸到干晒，送酒真系一流。另外我仲试咗佢嘅鳗鱼寿司同埋火炙三文鱼寿司，佢啲寿司好似圆辘辘咁好得意，原来圆辘辘嘅原因系因为中间都仲包住左一旧鳗鱼。另外我哋试咗佢嘅八爪鱼大阪烧，不过八爪鱼就唔系太多粒，如果多啲嘅话仲好食。之后仲试咗佢嘅刺身拼盘，佢有四款每样两件，牡丹虾真系好大只，净系食只虾都饱左一半。最后仲试埋佢一个好特别嘅菜式，叫带子刈包。佢系用带子夹住一只牡丹虾再加埋海胆，成个口感好丰富，再点埋用牡丹虾头淆出嚟嘅虾汁，真系虾味浓郁。佢而家嘅生啤做紧优惠，一杯都系$38。而我自己就拣咗佢哋嘅sake-白鹤大吟酿。佢呢个sake樽都好细心，个樽中间有个窿俾你摆冰，咁做可以冻住啲酒，又唔会令到啲冰融完沟淡晒。