田記魚蛋牛腩專門店 (塘尾道)

营业中

休息中

收晏咗懒得煮，同先生随便揾间面铺医肚已经成为常态，今晚拣咗呢间望落非常干净企理嘅面店。一般面店有嘅牛三宝、鱼蛋、牛丸、水饺、紫菜之类呢度都有，可以配搭粉面饭，价钱相当实惠。牛三宝有齐牛肚、牛筋同牛腩，汤底望落清澈，唔会有过多嘅油脂同浮沫，入口味道出奇地鲜浓，食得出落过下苦功。牛肚清洗得好干净，一啲腥味都冇，而且非常吸汤，入口软腍入味。牛筋炆得软而不烂，入口系充满骨胶原嘅嫩滑滋味。牛腩亦同样入味，而且肥瘦适中，唔会有难𡁻嘅筋位。崩沙腩位于牛嘅横膈膜附近，由于数量稀少所以每日限量，好幸运地晚市仲食到，而且份量颇多，浓郁嘅汤底配上米粉同样吸引，而且亦比较健康。崩沙腩连住少少筋膜，入口比牛腩爽口弹牙，肥瘦适中，而且牛味鲜浓，好有惊喜！饮品方面点咗冻柠茶同热柑桔蜜，冻柠茶中规中矩，热柑桔蜜味道香浓，几有惊喜。本来谂住颓食所以冇抱太大期望，估唔到误打误撞食到咁优质嘅牛腩，无论系汤底定系配料嘅质素都好高，先生更加认为系食过最好食嘅牛腩河！