殿 大喜屋 (裝修中)

之前同女朋友已经嚟过呢间殿大喜屋，难得女朋友钟意食呢间嘅日本放题，于是乎再带佢嚟食。刺身拼盘-食得日式放题，一坐低梗系要嗌刺身食先啦。先点左三文鱼、赤贝、北寄贝、带子等等刺身，食落新鲜又够冻，所以忍唔住又嗌咗第二round。海胆手卷-呢一个系必食项目，虽然要自己出去排队攞，so call叫限时限量食物，但其实我都攞咗三四转都仲有。佢啲海胆份量大大份，一旧手卷有两三大片嘅海胆，微微海水味，份外鲜甜，而且紫菜新鲜脆口，叫人忍唔住拎完又拎。三文鱼腩寿司-三文鱼腩油脂丰富， 配合微酸嘅寿司醋饭，真系配合得天衣无缝，微酸嘅醋中和三文鱼嘅鱼油，分外美味。蒲烧鳗鱼-厚厚嘅鳗鱼，肉质细嫩，配合酱烧汁，真系好食到停唔到口，叫完一碟又一碟。烧羊架-刚烧起嘅羊架即刻上枱，新鲜热辣，羊架带少少骚味就最好食，而且肉质林滑，谂返起都想再食。呢度除咗大量嘅甜品之外，仲提供多款嘅雪糕，有Movenpick, Häagen-Dazs仲有Milk Top畀你拣，我就唔识拣，唯有全部都食晒。