日溢中西美食 (已搬遷) 新店位置

寻日一条冷出左去揾野食, 喺冇头緖又冇咩胃口嘅情况底下, 就四围行下, 咁啱行到黎呢度, 师傅见到呢间食店, 加上从来都未黎过, 就决定一试!入到去环境几逼, 但胜在一个人容易揾位, 求其坐底就叫野食, 师傅见到佢个午餐都有几多选择, 最后就柯打左E餐, 而E餐系咖哩牛扒饭, 餐饮就要左冻咖啡!等左一阵就有得食, 咖哩牛扒饭都几大碟, 卖相唔差, 先试下个咖哩汁, 咖哩几香加上都几辣几好味, 而牛扒就切开一件件上, 肉质松身, 不过就有几重松肉粉嘅味道, 而薯仔就几腍几入味, 可以啦; 至于杯咖啡就一般啦, 皆因始终都饮到有d酸酸地嘅味道!总括黎讲食物质素可以, 而服务同环境都系一般, 不过价钱相宜, 三十蚊一个餐包埋冻饮, 都算抵食, 如果外卖就廿七添, 加多个餐汤都系加两鸡, 抵食啦! 师傅觉得呢间食店都可以, 所以宁愿行多几步黎呢间都唔会去𠮶间味皇, 至少呢间感觉老实d, 虽然唔知其他质素如何, 但相信大有机会再黎, 而个店名亦甚搅笑, "日溢"? 系咪即系日日? 日日都有中西美食? 笑脸就比唔到住, 可以接受啦!