釜之魂釜飯專門店 (淘大商場) (已結業)

呢间野啱啱开张嘅时候好多人排队，𠮶阵一直都好想试但系咁多人排队就不了。最近谂起呢间野，特登约朋友平日一齐食。餐牌上面款式选择不多，咁有可能系餐厅为咗保持食物质素所以款式比较少。首先我哋叫咗个鳗鱼肝，因为睇过食评有好多人都赞鳗鱼肝好食。一小碟鳗鱼肝份量唔算太多，有七至八个肝。鳗鱼肝味道甘香，加上餐厅特制烧汁同埋姜蓉，更加突出到鳗鱼肝嘅鲜味。嚟到呢度当然一定要食鳗鱼饭，我同朋友叫咗一个烧鳗鱼（鱼尾）釜饭。虽然系鱼尾部份，但系肉身厚，鳗鱼好大块，可以见到米系用珍珠米，珍珠米比较有咬口，会令到个饭更好食。呢个饭不论系鳗鱼肉，烧汁，野菜，米饭，就同喺日本食到嘅鳗鱼饭一样👍🏽我哋仲叫咗个烧鸡扒饭，烧鸡扒同碗一样大块，米亦都系用珍珠米。鸡扒肉厚身，有阵阵烧香味。我哋另外叫咗两款小食，第一款黑松露酱烧玉子。厚烧玉子上面有少少沙律酱，玉子入边混合左甜味鸡汤，果然系日式烧玉子。第二款系鸡翼，鸡翼外脆内嫩，虽然系炸鸡翼，但唔会太油亦都唔会太咸。总括来讲食物方面真系同喺日本食到嘅好似，服务员嘅质素都唔错，例如会好贴心咁叫我地趁热食鱼肝。假如再经过，又或者平日得闲会再过嚟食。