金萊原盅蒸飯

营业中

休息中

收工出黎旺角，本来想食吉野家，但发觉太多人排队，又唔想食金拱门。突然醒起朗豪坊隔离有个熟食中心，于是就去望望。行左两三个圈，就拣左呢间金莱原盅蒸饭，因为望落价钱最平食到个饭。叫左个土尤蒸肉饼饭，上菜好快，连钱都未收，叔叔就转个身叫厨房整个肉饼同饭出黎，仲有油菜送。服务态度都十分十分好，第一次光顾唔知野饮点收钱，我问佢：「冻饮要唔要加钱？」佢亦都好好态度咁同我讲：「冻饮加２蚊，热饮唔洗加钱」最后我都系无加钱叫左杯热柠水，但叔叔依然好好态度咁话：「无问题」，又即刻转个身冲左杯热柠水比我。服务满分！当时６点４５分左右，都算几易揾位，好快咁就坐低开餐，第一眼望落卖相唔错。先试左啖菜，几爽口清甜，不过都有少少偏咸，如果落少啲调味会更好。而个肉饼我先试左一口，唔。。。都几咸下，或者因为客人都以蓝领居多，佢地比较食得咸。最后我决定将个肉饼夹起，晾干啲咸鼓油，先再放落啲饭一齐食。肉饼仲有少少扣分系因为偶尔咬到幼身硬骨物体，应该系因为去骨唔太完整。饭入口有少少偏硬同干，可能系因为我只系连肉饼食，无加咸鼓油落去。如果你食得咸，加番少少落去口感会更好。