日日涮 (已結業)

旺角创兴抵食多选择火锅放题最近喺旺角创兴广场六楼发现咗一间几值得推荐嘅海鲜火锅放题，佢叫做日日涮。喺两个钟入面可以任食猪肉同牛肉，海鲜种类都有好多，分咗两层，有龙虾、蛏子、扇贝、蚬、蚝、大虾、鲍鱼、沙白等，非常鲜甜，海鲜要煮七分钟，蒸完开盖香喷喷，急不及待要食。龙虾好多膏，肉质爽口鲜甜；蛏子蒸到啱啱好，唔会韧；鲍鱼都几大只下，好正！喺等海鲜熟嘅期间，我哋出去拎咗啲熟食，有中华沙律，凉拌青瓜云耳同麻辣莲藕，可以顶顶肚饿。蒸气焗熟哂啲海鲜，海鲜嘅精华流哂落下面个南瓜肉碎粥入面，大家一定要试下！呢度嘅刺身都比到惊喜我，有三文鱼、八爪鱼、甜虾、鲍片、荣螺、希灵鱼、吞拿鱼、带子、赤贝、油甘鱼同䲞鱼，三文鱼够哂肥美；希灵鱼好爽脆。火锅配料除咗丸类之外，其他种类都有好多，有炸鱼皮、大生根、响铃、鱼腐、芝士肠、鱼蛋、芥末贡丸、芝士鱼豆腐等等；蔬菜种类都有好多，有萝卜、银芽、翠玉瓜、鸡脾菇、南瓜等，好健康！呢度嘅饮品亦都系我见过最多嘅，有成廿二种。我就最钟意饮苹果梳打。甜品都有成八款，一定有款啱我食；最后食埋条雪条，就好满足！