Freshness Burger (已結業)

有日同朋友行过皇室堡，见到依间新快餐厅未试过，于是抱著一试无妨嘅态度去帮衬下。其实一见个餐牌已经有啲想缩沙，因为价钱绝对唔平，而且选择亦唔多。本来我想食洋葱圈同饮梳打，但偏偏依两样嘢套餐都无，于是退而求其次拣咗个最平嘅热狗餐。嘢食嚟到已经好失望，条热狗嘅肠同包都唔啱比例，啲配菜既唔好食又跌晒出嚟，行过对面宜家小食部嘅热狗都做得好过佢，但系人哋足足平佢几倍！朋友叫咗个最平嘅饱嚟试，睇佢嘅表情我谂佢都系宁愿帮衬老麦。跟餐可以拣薯条或者薯格，但两者分别不大，食落都系觉得好口干，我哋最后都哽唔晒佢哋。讲返环境同服务，地方其实有啲逼，基本上一定要搭枱，而且座位不见得舒适。服务其实同一般快餐厅无乜分别，虽然话即叫即整，但睇唔出对食物质素有太大嘅帮助。加上佢系日式连锁，印象分再减多两分。简单嚟讲，俾Triple O嘅价钱但换来比麦记差嘅质素，一句讲晒就系唔值。但我最唔明嘅仲系好多人讲到佢哋好好咁，尤其系一啲OL更加系称赞有加，唔通佢哋觉得日本嘢就一定好？