影片
更多
2021-06-16
4171 浏览
如果大家对于大排档嘅印象中仲系叫𩠌食饭、食煲仔饭嘅话就错晒，呢间大排档一样都系食充满港式风味嘅嘢食，喺茶餐厅、冰室一定会食到嘅奶油脆脆同呢排香港人好钟意食既茄牛。香港有好多咩咩园，好似乐香园、绍香园、兰芳园，但一讲起中环、奶油脆脆、茄牛，大家就会谂起胜香园。胜香园系一间喺中环大排档嘅粉面店，呢间老字号系中上环屹立左半个世纪，系家族式经营。开业于1959年，胜香园以前是系玉叶甜品个个位，系30几年前先搬黎歌赋街依边，大家睇中胜香园，除左系佢既野食之外，唔多唔小都系这种露天式既大排档风情，够街边够地道。所谓既大排档即系街边档摊，环境简陋，外观多以铁皮同帆布组成搭建。全盛时期系二战后，政府为因公伤残或者殉职既公务员解决生计，所以发牌照，系街头租金负担低既情况下经营。不过由于卫生环境欠佳、阻街、市区整建等好多原因，1980年代前后政府开始唔再发放新牌照、补偿金鼓励持牌人缴交牌照，禁止转让同继承旧牌照权利等措施，令呢一种街头文化快速式微。直至2009年政府先有所意识，决议宣布大牌档保育计画，协助建设同环境翻修。呢家香港大牌档已经唔多，大家数到既系油麻地、深水涉，大排档式微都系令人想去胜香园既原因
如果大家对于大排档嘅印象中仲系叫𩠌食饭、食煲仔饭嘅话就错晒，呢间大排档一样都系食充满港式风味嘅嘢食，喺茶餐厅、冰室一定会食到嘅奶油脆脆同呢排香港人好钟意食既茄牛。
香港有好多咩咩园，好似乐香园、绍香园、兰芳园，但一讲起中环、奶油脆脆、茄牛，大家就会谂起胜香园。胜香园系一间喺中环大排档嘅粉面店，呢间老字号系中上环屹立左半个世纪，系家族式经营。开业于1959年，胜香园以前是系玉叶甜品个个位，系30几年前先搬黎歌赋街依边，大家睇中胜香园，除左系佢既野食之外，唔多唔小都系这种露天式既大排档风情，够街边够地道。
所谓既大排档即系街边档摊，环境简陋，外观多以铁皮同帆布组成搭建。全盛时期系二战后，政府为因公伤残或者殉职既公务员解决生计，所以发牌照，系街头租金负担低既情况下经营。不过由于卫生环境欠佳、阻街、市区整建等好多原因，1980年代前后政府开始唔再发放新牌照、补偿金鼓励持牌人缴交牌照，禁止转让同继承旧牌照权利等措施，令呢一种街头文化快速式微。直至2009年政府先有所意识，决议宣布大牌档保育计画，协助建设同环境翻修。呢家香港大牌档已经唔多，大家数到既系油麻地、深水涉，大排档式微都系令人想去胜香园既原因。
喺未疫情之前，呢间大排档一直都系旅客必食嘅人气店，以前的确要排成半个钟到一个钟，即使而家冇左游客嘅人潮，小店都系接近满座。店舖坚持慢工出细货，所以食佢哋嘅嘢食都要有啲耐性，喺繁忙嘅午膳时间，落完order等半个钟都唔夸张。主打蕃茄面同埋脆脆，𩠌、面同汤底都可以任意配搭。
位置离地铁站唔算话好近，系歌赋街，第一次嚟嘅话会有啲吃力，唔想行得辛苦可以经自动扶手电梯，系结志街落沿着上环方向行就会见到，佢嘅对面就系同样昔日人气嘅米芝莲美食九记牛腩，以前会见到胜香园一条人龙、九记一条人龙，附近正正就系今年亚洲50餐厅之首嘅大班楼。
前后食过两次胜香园，两次都系星期六晏就去，因为佢星期日唔开门，大排档环境当然简陋，枱面座位都唔可以讲系非常干净，不过上面会有雨伞、遮棚，中午时期唔系坐最出𠮶几个位，基本上太阳晒唔入嚟，有提供几把风扇，虽然环境唔理想，但依然高朋满座，唔使等位不过去到接近满座。
餐牌只有简单嘅两页纸，第一页就系佢哋嘅面食，可以自由配搭唔同既𩠌，但可以睇到佢右手边全部都系蕃茄字头，所以已经话俾你知蕃茄就系佢哋嘅招牌。而另一页就会见到其他多士、三文治同饮品。
枱上面会有基本嘅酱料，好似同辣椒酱同胡椒粉。
-
1️⃣ 奶油脆脆 💰21（👅: 9/10）
奶油脆脆
$21
439 浏览
2 赞好
0 留言
食过几次佢既脆脆上枱摆盘都系差唔多，好似米奇老鼠咁，脆脆都系即叫即制，上枱热辣辣，比起蕃茄面呢个更加要趁热食，因为咁先保持脆口。呢度既脆脆同多士都系用800W多士炉，面包特别拣选半机械、半人手制造，奶油脆焗得好香好脆，系我食过咁多个脆脆最脆嘅一个，第一口咬落系会偏硬少少，但咬完落去就系非常脆嘅口感，脆到系身边嘅人都会听到有声，随即就系脆脆入边嘅松软口感，脆到好似食紧饼干咁，呢一种嘅松脆度食过咁多间茶餐厅都做唔到，食完会谂系咪越简单嘅嘢越难做得好食。
而奶油份量非常足够，食落系偏甜，有一啲已经渗咗入去脆脆入边，所以食落唔会话好干身，如果唔系咁钟意食好甜嘅人未必接受到，牛油柠檬汁蜜糖会更加适合，食落系非常邪恶但就系满足无比。
-
2️⃣ 牛油柠檬汁蜜糖脆脆 💰21（👅: 8.5/10）
牛油柠檬汁蜜糖脆脆
$21
68 浏览
2 赞好
0 留言
柠檬汁食落清香，会食到牛油香，所有调味都搽得非常之均匀，口感清新，令人耐人寻味。牛油柠檬汁蜜糖比起奶油冇咁甜，食落会冇咁腻，因为柠檬汁会稍为中和蜜糖既甜，酸味会比甜味出啲，所以食落系开胃，但个人会钟意奶油多啲，今日食落唔够喉唔够过瘾。
要挑剔既系食脆脆一定要用手罗，用筷子基本上夹唔到，但胜香园无提供清洁用纸巾或者湿纸巾，要自备一下。
-
3️⃣ 蕃茄牛肉蛋通粉/面💰36（👅: 8/10）
呢度既蕃茄底用炒香过嘅茄膏、新鲜蕃茄、鸡汤等熬制而成，至于其他配料都系任意配搭，有10几款选择。
蕃茄牛肉蛋通粉
$36
106 浏览
1 赞好
0 留言
上枱时系热辣辣，汤底呈红色，但唔系浓稠嘅汤底，蕃茄汤饮落非常浓郁，甘浓起沙，蕃茄味非常重，系够酸，而酸味系黎自新鲜既蕃茄，而唔系人工嘅酸味，茄膏嘅甜味唔算好出，系天然嘅味道多啲，酸味会比甜味多好多，食落非常之开胃。而蕃茄嘅数量都几多，真材实料，食起嚟淡淡茄肉，而且已经煮到腍身，接近变茄蓉嘅状态，成个汤唔会话好油，系一个好多主打蕃茄汤嘢食嘅餐厅时代，呢个蕃茄汤都系可以占一席位。略嫌汤太多，对比起蕃茄同牛肉嘅数量，所以上枱时基本上系睇唔到牛肉，沉晒底，用匙羹不上嚟先见到牛肉其实系唔小。
蕃茄牛肉蛋通粉
$36
62 浏览
1 赞好
0 留言
鲜牛肉份量都系唔会孤寒，虽然细块，但是对比起其他店舖，食起嚟系好软嫩多汁，食得出好新鲜，唔算鞋唔算韧，牛肉软谂程度，唔系好似茶记咁用肉松粉，所以食落唔会有碱味，肉质食落都系自然。牛味就唔太食到，不过喺大排档、茶餐厅来讲，牛肉只要咬得开已经好足够。
煎鸡蛋就不过不失，唔会话煎到窿咗，蛋黄起码仲系流心，蛋黄既甜味同蛋香味会比蕃茄既酸味盖过，下次会试下炒蛋，感觉食落会变炒蛋蕃茄。
通粉会比面更加索汤，因为佢个空心可以令到更多汤同茄蓉渗入去，通粉食落唔会话煮到好腍，软而不粉，系合格嘅通粉。
蕃茄牛肉蛋面
$36
32 浏览
2 赞好
0 留言
面系用出前一丁，面质我系几钟意，因为佢煮到偏硬身少少，而唔系腍身，个人食面类都系钟意硬身啲，因为腍身完全冇口感可言。
-
4️⃣ 冻奶茶💰15（👅: 8/10）
冻奶茶
$15
26 浏览
1 赞好
0 留言
冻奶茶以丝袜奶茶既作法黎整，饮落够冻，够香滑有奶香味，奶味会比茶味重，所以饮落整体甜味会比较够香滑有奶香味多。如果钟意奶味浓一点既朋友，呢杯奶茶肯定系你杯茶。
-
🌟酸甜嘅蕃茄、腍滑牛肉、爽滑嘅通粉，食落开胃饱肚，价廉物美，身为香港人好难抗拒呢一种美食，看似做法简单，但要将三者完美咁结合，非常考大厨火候控制度同埋食材嘅新鲜度。香港有好多主打蕃茄汤嘅餐厅，好似蕃茄师兄、red object、蕃满门、华嫂、楼下冰室、星座冰室等等，胜香园作为香港茄汤既始创者，绝对唔会比下去，嘢食当然唔系好精致好打卡，但胜在水准系有。茄牛通、茄牛面、咸柠七、奶油脆猪简单朴实已经好好食，绝对系香港人既comfort food， 如果我住附近，一定会成日黎食。
以前仲有好多游客个时，胜香园出名店员服务态度差为名，改单会态度差，而且坚持唔比加单，系呢一段艰难时期，帮衬过两次都感受唔到澳牛式服务，卖单赞姐姐计数快仲笑笑口有倾有讲，可能生意大不如前，人龙店都要变得嫌虚、礼貌一啲。
冇晒游客嘅情况下，胜香园已经唔使点排队，两次去都系可以即刻坐低唔使等，不过夏天嚟食就会比较热啲，因为始终系露天大排档，冇冷气得风扇，而且喺马路边，但大排档就系食呢一种嘅特色，呢一种嘅怀旧味道，冬天喺呢个露天地方吹着风食碗热辣辣面可能会更舒服。
喺呢个疫情嘅时期，小店买少见少，再加上呢一啲铁皮档嘅大排档，硕果仅存，唔知几时会因为政府一句话收返，到时想食都冇得食，就只可以变成大家嘅集体回忆，所以无论系想一试大排档风味，定系一试好代表到香港特色嘅奶油脆脆，定系要带外国朋友一试香港特色、但外国不常见既美食，除左谂起歌赋街既九记，呢间人龙店胜香园都系我既口袋名单。
-
👅味道: 8.5/10
🍴环境: 6/10
💰消费: $70 (服务费: NA)
张贴
