龍皇酒家 (開源道) (已結業)

近排都算係有食神，飯局一浪接住一浪，繼剛品嚐完滔哥、Harlan Goldstein、Alain Ducasse等管理之下嘅餐廳，今晚又嚟到熾哥嘅龍皇。其實一直都幾欣賞熾哥嘅烹調功夫，佢懂得將材料同煮法中西合璧，令食客有意外嘅驚喜。整晚食物水準非常平均，個炖螺頭湯用料十足，入口濃郁，值得推介。另外特別要一讚那道黑松露焗石蠔，石蠔非常肥美，再加入黑松露醬汁來焗至金黃色，香口之餘完全不覺肥膩，亦係熾哥典型嘅中西合璧煮法。