Smokey Ice (已結業)

呢日去咗白布街新开嘅Smokey Ice，佢哋晌元朗起家𠮶阵已经想试，上年就进驻荔枝角，近月晌旺角开店，对我嚟讲就比较方便少少。地下都有几多位，另外仲有楼上阁楼座。我哋先系叫咗呢碟好似系肠粉嚟试试，骤眼睇真系几可乱真，佢用咗朱古力酱同士多啤梨酱伪装豉油甜酱，士多啤梨片、菠萝同豆腐雪糕就分别扮演猪皮萝卜之类嘅角色。鱼蛋系吉列麻糬，咬起嚟外面脆入面烟韧。肠粉就系爽滑嘅椰汁味蒟蒻，个样好得意，味道几讨好。除咗甜品之外，佢哋仲有几款小食。单睇呢碟水牛城鸡翼同蜜糖鸡翼嘅卖相已经分唔清是真是假，其实佢哋系真鸡翼嚟嘅，水牛城鸡翼酸酸辣辣几惹味，蜜糖鸡翼就甜甜哋咁都唔错。 最后仲试咗两杯特饮，似酒嘅上层用椰子忌廉做出啤酒泡效果，下层茶味甘香。玫瑰佳人表面同样系椰子忌廉，不过就换咗做淡淡嘅玫瑰甜味，听返店员讲佢哋迟啲会有手工啤酒，所以就特登整呢啲外表好似酒精咁嘅特饮，俾啲一大班人嚟但唔饮酒嘅人开心吓。