Doubleshot by Cupping Room (已搬遷) 新店位置

Item: Doubleshot by Cupping Room
Rating: 5
Author: DanSum

316 食记

味道

环境

服务

卫生

抵食

26759

中环

$101-200

西式 All Day Breakfast 咖啡店楼上cafe

226

DanSum

等级3

相信好多中环返工而又钟意饮咖啡嘅人都会去过 Cupping Room。我都间唔时有去买咖啡饮 (因为佢哋啲咖啡真系好好饮），但系就从来都冇试过去𠮶度食嘢。早一排，有个中学同学同我讲 Cupping Room 会开一间餐厅，我冇特别去留意餐厅喺边度。大概两个星期之前，我行过 DoubleShot by Cupping Room 楼下一间专买相嘅铺头，俾𠮶间相铺啲好大张嘅相吸引左我入去，无意中发现原来DoubleShot by Cupping Room 就系𠮶度。本来都想早一啲过嚟试一试，但系因为新型肺炎嘅关系，所以呢两个礼拜一直都买外卖返公司食。直至今日，我终于顶唔顺困住喺公司食外卖，决定要去呢间餐厅试试。

餐厅入面原来都几开阳，因为佢一边有个好大嘅窗，而佢个窗系长期开嘅，所以空气都好流通，最啱而家细菌当道嘅时候去。唔知系咪呢个原因，呢度间餐厅都算做有几多人。

佢有个 set lunch menu。$168 两个 starter，一个 main。虽然啲每一碟份量唔系好多，不过一个唔系好贵嘅价钱满足我三个欲望，我觉得都几抵食。

我第一个欲望就系 crispy potato 千层薯仔。可能因为个名嘅关系，令到我以为佢系超脆，但系食落去冇我想像中咁脆，不过都好食。见到第一个印象会系觉得佢系薯条，但系如果你咬落去你就会发现其实佢系用一块块片状薯仔叠埋整成嘅薯条。所以食落去嘅口感同一般嘅薯条唔同，会有多番一啲咬口。另外有两款酱俾你点，沙律酱同埋 bravas sauce。个 bravas sauce 我食到好似有啲 chorizo 辣肠嘅味道，辣辣地，味道好浓，好味！

之后有 baby purple kale 羽衣甘蓝沙律，我从来冇见过咁靓嘅羽衣甘蓝，佢不单止系绿色同紫色，睇落去啲颜色好靓，而食落去都系非常之嫩。羽衣甘蓝本身都系一样好有益同好健康嘅食物，沙律仲有一啲同样系好健康嘅藜麦。个沙律仲加咗三种唔同颜色，红色、橙色同埋绿色嘅车厘茄。最初食𠮶阵时唔系好咸，不过食到底有少少过咸，可能啲盐嘅唔系好均匀。

第三个欲望最后就系厨师早餐 chef’s breakfast，最初我以为𠮶啲火腿系 Parma ham，但系一食落去就食到𠮶啲肉味好重同埋有啲榛子味，我就估佢系 iberico ham，check 返个 menu 就确认咗佢唔单只系 iberico ham 仲要系 aged 咗30个月，好食。系只蛋同埋块面包中间其实仲夹左一啲上边讲过嘅三色车厘茄。

整体来讲我觉得厨师做𠮶啲食物都系一啲手工野，睇到厨师摆咗好多心机落去做一啲简单嘅食物。虽然呢一间餐唔系好贵，但系厨师都好注重味道同埋 presentation。而且系用一啲高质嘅食材。

本来都冇谂住要饮咖啡，因为个餐唔包。但系我见到隔离有一个相信系老板嘅朋友叫咗杯咖啡，咖啡师 barista 同果位客人解释冲咖啡嘅心得解释得好清楚同好细致，所以我最终都系忍唔住叫咗一杯手滴咖啡 single origin coffee。佢有几种俾我拣，我就拣咗 shembati。

其实我好少饮呢类嘅咖啡，一系就饮啲好浓嘅 expresso ，一系就加奶饮嘅 flat white。呢一种咖啡饮落去，出奇地好清新，简直好似有啲初恋嘅感觉。佢冇乜苦味，有一啲酸味，冇乜 body ，但系感觉好纯，仲饮得出barista 所讲嘅生果味。

餐厅里面嘅侍应同埋barista，都有礼貌，保持笑容，对食物同埋咖啡提供有关嘅解释。

总结：
- 餐厅几开阳，最啱而家细菌当道嘅时候去
- $168 lunch set - 一个价钱满足三个欲望
- 推介：crispy potato，baby purple kale，chef’s breakfast
- 厨师摆咗好多心机落去做一啲简单嘅食物
- 用一啲高质嘅食材
- single origin coffee (shembati) 好清新，有啲初恋嘅感觉
- 侍应同埋barista都有礼貌，保持笑容同提供解释

PS 可能之前有睇过我写食评嘅人都会有一个感觉就系我净系会俾高分俾啲餐厅。咁其实唔系因为我俾分比较松手，而系因为如果𠮶间餐厅一般或者唔好，我都费事去写一啲食评出嚟帮佢做间接宣传，同埋嘥咗啲读者时间去睇。