慢煮工業 (已結業)

经过呢间餐厅好似几正，试吓先。拨开胶帘进入，帘后系一个小小空间，餐厅系喺楼上。爬完楼梯上到去，餐厅都几大，不过就唔系全层开晒，我谂闲日午市佢只开一边大约十零张枱。上到去1:40左右，午市接近尾声但仍然几多人。等候侍应带位期间四围望吓，喺门边竟然见到一个人咁高嘅关公坛，真系估佢唔到，西餐都摆关公。除咗呢样，其实餐厅装饰摆设都正常嘅，似𠮶啲新派cafe。我点咗西冷扒，餐汤系忌廉蘑菇汤，再加$8 要埋杯咖啡。个汤味道唔错，佢最值得赞系够热，想喺香港揾碗热汤唔系咁易㗎叶师傅。咖啡都好香浓，啲奶系泡沫，而且仲热辣辣，做足功夫。不过个主角西冷扒就唔系好得，干争争鞋烚烚，仲有啲靭。肉味系有，但唔特出，几啖之后已经食唔出肉味。其实如果整得唔好食不如唔好慢煮啦，正常咁煎可能会好啲。唔知系咪得西冷系咁，或者有机会试吓其他。今餐埋单$117。食完先谂起原来我之前试过佢另外间分店，都怕有四、五年前，𠮶阵睇咗报导去试。我差啲唔记得帮衬过，即系当时唔太impressed，我谂同我呢餐咁上下感觉。虽然唔太啱我，但呢啲餐厅都值得存在嘅。呢日正值情人节，就算晏昼流流都有两三对小情人嚟庆祝，非常sweet sweet。