豚王 (V Point)

营业中

休息中

想食拉面就会去登龙街系常识，虽然唔知食边间但系总有一间啱口味。其实豚王之前系中环都食过，不过铜锣湾呢间装修唔错，好有空间感，背后系落地玻璃连接街境，抬头会见到粉粉嫩嫩嘅假樱花装饰，令人净坐已经感觉好舒服。我同朋友分别要左黑王同限定王。黑王选择左少香油，多蒜，肩肉，椰菜同普通软硬度嘅幼面。上枱𠮶阵虽然唔系特别香，但系一食入口𠮶种浓郁嘅黑蒜油味即刻好出，汤底亦感觉好足料好稠。本身唔钟意食肥肉但系又惊食肩肉好似食柴皮咁，但系呢到嘅肩肉虽瘦，但系非常淋身好好食。食到最后虽然有啲腻，但系饮返一啖佢哋免费嘅柠水就可以成碗食晒😋另外朋友叫嘅系今期嘅限定王，就系咖喱口味嘅元气王。两碗拉面一同上枱，但系佢嘅香味就盖过黑王。朋友选嘅系腩肉同淋啲嘅幼面。咖喱汤底香，但系无黑王咁浓，啱啲钟意清新味道嘅人食。朋友亦大赞腩肉好有油香，同拉面好夹。不过最令我欣赏嘅系普通硬度同软面只差一级别，但系真系令人食得出分别，2者入口都美味但明显不同，火喉控制得好好。