水記

营业中

休息中

作为大西北人，平时食开屯门红桥某间旧式粉面店，食过果间之后好少再揾到其他店舖取代，更加唔洗讲起港岛揾到一间食完会回头嘅牛腩面。前排睇youtube见到有人介绍水记，见到佢嘅制作方法同埋故事之后，趁今日假期就即刻过海嚟港岛一试，上网睇话11:30开门，谂住差唔多够钟先去到，点知11:25已经坐满人，好睇仲有二人位，但个环境真系好怀旧，食食楼上会滴水，张枱櫈就非常斜嘅，不过嘢好食就得。今次叫咗一个爽腩河一个牛杂河，爽腩非常入味同淋，绝对唔系其他人讲嘅柴口或无味，同我屯门食果间有得比，但屯门果间好难食到爽腩，因为好早就卖晒，呢度就仲有得食👍 牛杂方面我本身唔系好识食，亦唔算好钟意食，但呢度一啲都唔腥，好入味，都可以一试，特别一提佢嘅汤好清甜，非常好食。另外我亦叫咗一份鱼皮，佢系连骨炸嘅，亦系我食过数一数二最好食嘅炸鱼皮，非常推荐。我仲叫咗一枝菊花茶，个人就嘛嘛哋，因为系好甘苦嘅，感觉好清热解毒，如果饮开苦茶嘅应该钟意。