禮 (天光道) (已結業)

聽同事講土瓜灣近排新開咗間日本嘢，收工搵埋友人去試下先。一入門口就見到bar檯上方有好大個月亮，用嚟打卡一流。先點咗份辣酒花螺食下先。花螺size比較細粒，肉質彈牙有口感，食落好辣煮得好入味。另外伴碟仲有蘿蔔粒，細細粒易入口煮得好腍。厚切牛舌肉質煙韌有口感，食落有陣陣炭燒味。鹹蛋豬肉棒外層香脆，中間餡肉結實，食落好香。極上刺身四品盛有油甘魚、吞拿魚、帶子同章紅魚，每款味道都好鮮甜。吞拿魚壽司盛有三款唔同嘅拖羅壽司，另外仲有三件小卷物。刺身肥美肉厚，壽司飯握得結實，整體質素唔錯。