百好宴會廳 (已結業)

酒楼一周年，晚市两位以上惠顾送例牌烧鹅，仲唔计茶钱同加一，好似好著收咁㖞！于是来帮衬。可能因为做推广，平时间酒楼都无乜人帮趁，今晚竟然要等位，就算连接待员，都好似唔系好惯晚市有人等位，面对等位的客人愈来愈多，个接待员六神无主咁，我地刚报完几位，转头又问；嚟多咗人，见你企系度，又再问，结果问左成四五次，先有另一个睇嚟经验丰富的经理，识得派"飞"畀等位的客人。等咗差不多半个钟，先入到席，埸内果然爆，但泰半打边炉。小菜菜牌仅得一页前后两版，一版主打海鲜，另一版主打小菜，选择不多，价钱偏贵，普通炒菜都要六十元碟，肉类小菜动辄七、八十，比起平时贵咗最少20%！所谓优惠，原来都羊毛出在羊身上。由于得两个人，谂住仲有烧鹅送，只点咗两个菜，分别是：- 金银蛋苋菜：碟头都几大，做得OK，不过不失。- 京葱炒牛肉：好香口，京葱吸咗啲酱汁好惹味，但啲牛肉，腌到无哂质感同味道……至于只送赠O既例牌烧鹅，由于太多人帮衬关系，酒楼应接不暇，O系我地食完哂所有𩠌先送上嚟，烧鹅皮都算香脆，肉质都算滑，都系不过不失啦！虽然整体水准不差，但本著优惠先帮趁，结果计落同平时价钱差唔多，始终觉得唔系咁抵啰！