古今二 (荃灣千色匯I) (已結業)

嚟到呢间位于荃湾千色荟嘅古今二，临近圣诞，嚟到呢间铺嘅时候门口装饰增添左一份圣诞气氛。铺头嘅装修都系以白色同浅色为主，呢度食嘅日本菜主要都系一啲日式嘅创意料理。前菜首先叫咗一客龙卷风沙律，嚟到嘅时候都几有惊喜，因为沙律叠得比想像中高，卖相就真系好似一个龙卷风咁样，亦都似一只巨大嘅八爪鱼沙律咁，用料方面就系用咗蟹柳、蟹籽同沙律菜加酱汁混合而成嘅沙律，份量都相当多。然后点左一客网烧牛舌，呢度嘅牛舌好在够晒肉地，上碟时烧得够热，食落时候咬口都唔错，唔会咬唔开。唯独系个人比较偏向食一啲烧得较干爽嘅牛舌，而呢度嘅牛舌就相对油腻一点。今晚最钟意嘅一个菜式就系个三文鱼头汤锅，虽然佢系鱼头，但系都算几多肉食，而且肉质非常嫩滑，成个汤又充满鱼鲜味，配埋锅里面嘅蔬菜同埋豆腐咁食，感觉都几满足。至于寿司方面，叫左个金龙卷，即系炸虾卷再加三文鱼混合嘅一款寿司，感觉食起嚟就好似平时嘅炸虾卷再加埋花之恋嘅味道，味道都算搭配；而最后就叫咗一客火山，顾名思义，就系将一啲蟹柳蟹肉，再加埋蟹籽同唔同酱汁混合而成，系一啲蟹柳寿司卷上边堆成嘅一个火山嘅模样。食落淡淡蟹肉都几和味。