Second Bite Bar & Grill (已結業)

虽然位置唔系话十分方便，但都唔算难揾，系长沙湾C2出口行过去都系十分钟左右。一入到去就会见到两张bar枱，餐厅都有cocktail提供，俾你同朋友吹下水饮下野，都几relax。再行入少少就有正常食饭枱，系云石花纹，睇得出都有用心简过，枱同枱之间唔会好逼，楼底又够高，讲野大声少少都唔会惊嘈到人。今次同朋友黎，一人叫左个主菜share黎食，份量都多，一定够食，味道仲有惊喜添。叫左个波士顿龙虾牛角包配双色薯条同沙律。个人偏好蕃薯条，好甜好脆，牛角包仲好酥脆，讲到重点既龙虾，咬落去每啖都食到龙虾肉，绝对唔系hea你，一个包入面得一两啖龙虾肉果D。另外仲叫左个大虾浓汁意粉，个酱汁有好香浓虾味，仲有好多海鲜，又有虾、蚬同青口，唔好睇佢份量好似好少，食落其实好饱肚。两个主菜都唔错，超出我预期。