CHIMPZ (已結業)

同朋友行行吓街，发现咗渣甸街里面有间小店，望落价钱亦合理，一于试试佢。白酒牛油煮大蚬蚬肉好新鲜好肥美，充满着蒜蓉牛油嘅香味，必食推介。猩猩迷宫呢个九宫格设计的All day breakfast, 好得意，入面有红菜头番薯沙律，牛角包，牛油果沙律，大啡菇，菠菜，大蕃茄，烟三文鱼配蟹籽，黑松露炒滑蛋及直布罗陀肠。打卡一流之余，每款嘅味道亦唔错。香煎北海道带子配黑松露烩意大利饭带子大大粒，煎到好香口，配埋口感丰富的黑松露意大利饭，完全系味觉享受。烤苹果脆顶奶酥配雪糕超有水准的一个Apple crumble, 甜度适中，奶酥饼配脆脆加埋烤热咗嘅苹果配cookie味雪糕，同时感受到冷热系口入面个种层次。法式焦糖炖蛋焦糖面烧得刚好，唔会太㶶引起苦涩味，炖蛋亦好滑。呢间小店食物质素及服务都好好，价钱大众化，位置又方便，一定会再翻转头帮衬。