悅滿軒

如果唔系屋企人介绍都唔知道有饶宗颐文化馆依个地方，里面仲有间真正隐世又高质嘅餐厅添！点餐后先送上微暖嘅自家制蕃茄面包，外面烘得好脆而且好香蕃茄香草味，配上黑水榄牛油够特色。海胆汁浓郁好鲜味，手工意粉有嚼劲又挂汁，加埋弹牙嘅粒粒八爪鱼肉，令人回味无穷。伊比利亚羊架啖啖肉，带有淡而香嘅羊膻味，外面煎到焦香但肉仍然好嫩，配埋甜甜地嘅砵酒汁真系好夹；羊肉肠亦都好特别，比平时食开嘅猪肉鸡肉肠味道更浓仲有油香。牛腹肉脂肪较少重肉味，五成熟嘅口感好嫩滑，本身调味唔多，另外附上粗盐、墨西哥青酱、杂椒汁同芥辣自由配搭。伴碟仲有原个焗蒜头，蒜肉焗到腍晒食落原来几香甜。最后食埋个apple crumble，面头嘅焦糖装饰够抢眼，金宝焗得香脆，冷热交融好滋味，连雪糕都系自家制嘅，真系好有诚意呢！