南瀛水產

今日谂住同朋友庆祝所以黎左呢间食水产。我地8点半去到仲有好多人食紧，睇完餐牌都知呢间系偏贵，不过间唔中食一两次姐。叫左两杯野饮，不过最少都要$50左右一杯，然后就开始简啲我地想食既野啦。叫左个五点盛，系有5种鱼生，鱼生好腍，入口即溶，唔错！南瀛卷真系几惊喜，系包住生菜既卷上面可以自己摆埋舌拿鱼、海胆同埋三文鱼子，好鲜甜同出面食既唔同。呢到一定要叫烧野，叫左条烧鱼，佢有牛油味甜甜地，鱼都好多汁，平时唔食鱼既人都会钟意食。一直想试烧蟹膏好耐，呢到甲罗烧加左蟹籽同埋蛋，虽然唔系好食到蛋味，不过蟹膏好好食又唔会太腻，一人一只岩岩好。