好煮意 (已結業)

住西貢但好少有機會係西貢食晏，今日難得有機會，終於試到成日想食嘅"好煮意"。初初睇外面以為係普通茶記，但原來唔係嗰回事，環境乾淨，座位舒適。食物種類唔多，但樣樣都幾吸引。我同家姐叫了醉豬手米粉$48同喇沙$68，跟餐包飲品。醉豬手好食，個湯底好清甜，用咗20個鐘"淆"，無添加調味！豬手都好入味！仲可點吓佢哋嘅自家製辣椒醬！ 喇沙估佢唔到咁正，好正宗，個底有油麵米粉兩溝，料足有份量，隻蝦新鮮，仲窩心到剝咗蝦身嘅殼，方便食。👍食飽仲外賣多一客醉豬手$68。一定會再幫襯！P.S. 食完好耐都唔覺口渴，無味精確係堅！