高興 (已結業)

如果返工, 放工都要喺同一区食饭应该会好闷, 不过对于喺观塘返工嘅我嚟讲, 暂时就无呢个问题, 因为观塘实在有太多工厦餐厅, 真系咩款式都有。呢间餐厅最好嘅就系无限时, 疫情底下餐厅因为收22:00嘅关系, 好多都会限时 90 分钟, 如果想同朋友倾计根本无可能, 所以无限时呢个卖点对我真系好吸引! 🆙🆙🍴意式茄茸帆立贝意粉帆立贝有3粒, 粒粒都好厚肉, 煮得刚刚好, 所以食落好Juicy! 意粉汁充满茄茸, 好清新, 唔会有食到腻嘅感觉。🍴日式淡咖哩牛肉汉堡温泉蛋饭上碟时已觉得牛肉好干身, 食落口都系干争争嚡烚烚…温泉蛋味道唔出, 有佢同无佢嘅分别不大。🍴黑松露酱粗薯条粗薯条脆口, 黑松露酱系分开点嘅, 亦都比较杰身, 食到后期会觉得太腻。🍴香蕉蜂蜜沙冰浓浓香蕉味, 因为加咗蜂蜜所以偏甜, 不过都好饮。整体食物唔算特别出色, 不过系一个倾计聚会嘅好地方。