九鬼居酒屋 (耀華街)

营业中

休息中

自从有返晚市堂食之后，不停咁约朋友见吓面，今日就约咗个港岛朋友去铜锣湾meet一meet。大家都话唔算好肚饿，所以就拣咗九鬼居酒屋食啲嘢兼饮番杯。餐厅入面嘅布置配合店名，周围都见到日本鬼。首先嘅前菜就拣咗刺身沙律，沙律菜之上有满满嘅角切刺身，最后仲加上藏红花。唔同嘅刺身包括有三文鱼、吞拿鱼、剑鱼腩等，粒粒饱满。芝士三文鱼卷摆盘已经够精致。入面卷有三文鱼同厚厚嘅芝士，再配搭青瓜丝，感觉清新唔油腻。嚟呢度当然要叫返一啲佐酒小食，炸池鱼仔系我近年嘅至爱，而且份量都好多，感觉就好似五饼二鱼咁，食极都仲有。另外当然唔少得唐扬鸡软骨，咬落爽脆，甚有口感，配有日式芥辣沙律酱，非常醒神开胃。之后就拣选咗几款串烧，其中厚切牛舌味道甚有惊喜，形状四四方方，口感更爽口弹牙，令人想一试再试。鸡翼外皮烧得非常脆口，而入面嘅肉质仍然保持鲜嫩，用嚟送酒一流。翠玉瓜简单烧熟之后轻轻洒上薄盐，味道亦唔错。同朋友饮番杯，享受一个欢乐嘅晚上。