嚐仙 (已結業)

几个月前夜晚七个人去过呢间食甜品，𠮶阵个收银员收紧钱，所以我哋就企喺门口等佢安排入座，点知隔离有一班大陆大妈自己行咗入去坐低，个服务员竟然唔理佢哋，我哋出声话佢哋打尖，佢净系帮我哋安排更加细嘅位，其实根本唔够七个人坐。但之后我哋谂住食个甜品，就算数，冇再追究。（甜品中规中矩）隔咗几个月，两个人平日晏昼再去食，喺门口嗌完嘢食就入去坐低，得三成入座率，但系空嘅座位全部都冇清洁。我哋求其揾咗个位坐低先，谂住再举手叫佢哋执嘢，但系一个人都冇。隔咗几分钟有个女仔捧住兜仙草过嚟，佢见到我哋枱湿晒，枱面仲有上手食剩嘅碗，但系佢竟然直接摆上去！我哋叫佢先执走，问佢攞多只匙羹，佢黑口黑面咁样话：「自己攞」。我以为佢冇手，所以迟啲先抹枱，点知佢执走咗，就冇再返过嚟，成个枱面仲有上手啲甜品渍，黐笠笠，仲要系好明显𠮶种，佢冇可能见唔到。甜品方面：仙草、珍珠、芋圆都冇乜问题，不过芋泥冇甜味好难食，食紧一旧芋泥质地嘅不知名物体咁。