翠亨邨 (美麗華廣場1期)

营业中

休息中

話說一個星期二嘅下午，大約三點，去到尖沙咀想飲茶，唔知仲有邊間可以入座，諗起美麗華商場5樓嘅翠亨邨，即管試吓囉，佢又幾好，雖然仲有5分鐘就截單。都比我哋入，結果可以坐到四點，都算係咁啦，而且職員嘅態度唔錯，並冇因為我哋遲去阻住佢落場，而有面色俾我哋睇，反而招呼得幾好添，點心方面水準穩定啦，美心集團裏面嘅其中一個名牌，價錢當然唔算係平，但係喺咁嘅地段，面對着九龍公園嘅美景，自然光充足，都坐得好舒服，我哋人少少，叫咗幾個點心就算啦，費事太多食唔切又阻住人哋收工，結果每個點心嘅水準都好好，雖然食得趕啲😅我覺得其中最好嘅係蒜香春卷，因為佢炸得來唔係太油，裏面嘅餡料嗰啲蝦膠，都係清清淡淡，雖然係炸物，但係食落口都好清爽，味道相當唔錯，蝦餃就相當大粒，比起出邊而家一啲迷你版，真係足料，粉果裏面有少少胡椒粉，味道唔太搶，好味嘅，牛柏葉就最值得一讚，因為食落去就知唔係嗰啲中下價酒樓嘅貨色，零舍爽滑，同埋鮮味重好多，薑蔥亦冇話落得太多太油，整體嘅感覺適合而家一般人嘅口味，茶錢$18一個，唔算貴啦，而家好多好普通嘅酒樓都要收到$15啦，但係佢啲茶係唔錯嘅質素，下次有時間會再嚟。