丸十寿司日本食堂

营业中

休息中

朗豪坊美食推荐😍成日去朗豪坊，竟然唔知12楼有间好高质嘅日本料理 -- 丸十寿司。佢其实唔止寿司食，应有尽有，我哋lunch time去嘅，人唔算多，有套餐可以拣☺️我哋拣咗特上海鲜丼定食、寿司+刺身定食，仲有串烧同炸鱿鱼，仲有个好特别嘅寿司汉堡。推荐呢款海鲜丼，好丰富，鲜甜嘅海胆、大大只嘅虾、好味嘅带子同厚切三文鱼、再加上粒粒三文鱼籽、啖啖蟹肉。。。真系好满足😌而另一份都好足料，有刺身、寿司，再加𠮶迷你鲔鱼丼，啲鱼蓉铺满成个碗，每啖都好香口，啱晒钟意食鲔鱼嘅朋友。午市套餐包汤同沙律，仲可以加钱加小食同饮品，我哋就加咗份劲厚切嘅三文鱼刺身同劲好味嘅鱿鱼酥，估唔到佢嘅炸嘢整得咁好食，一定要加。除咗鱼生，串烧都系唔错嘅选择，我哋就拣咗鸡拼盘，入面有齐鸡肉、鸡翼、鸡皮、鸡肾，仲有用鸡软骨整成嘅鸡肉棒，呢个棒最好味。最后要介绍吓个寿司汉堡，原来好大份，真系好似个汉堡咁，我哋拣咗炸软壳蟹，真系成只上，炸到金黄香脆，而上下两层嘅米饭，都系煎过嚟，口感烟韧香脆，好特别。佢环境好舒服，食物都好唔错，行开朗豪坊嘅朋友不妨一试呀。