季季紅風味酒家 (已結業)

本人于 2017 年 3 月 24 日晚约 8点半度，响季季红门口经过，本身想买饭盒食，又见到佢有外卖烧味饭卖，咪买嚟试下啰。叫左烧鸭饭，到烧味哥哥就嚟包盒饭时，我问佢拎姜蓉，咁佢即刻好恶咁话：“包左喇，下次早啲讲吖。” 我心谂，我以为你系比现成 pack 好嘅姜蓉嘛，同埋你都系揭番开个饭盒啫，唔会难得过你斩烧鸭啩，我都谂住唔比咪算啰。点知佢闹完我之后，望一望我，仲嬲啲咁再重覆一次：“下次早啲讲吖”, 跟住就一大 pat 姜蓉咁笔落啲饭度。我完全明白呢位哥哥嘅心路历程，好明显佢望到我个样傻下傻下知道恰得, 就放心再凶你一次，再谂咁钟意姜蓉丫喇，比你啰。番到去食，食过呢啲饭都知道都系食头头尾尾㗎啦，再加埋啲饭比姜蓉浸过哂，真系咸到惊有肾病，咁就冇左廿二蚊。食唔饱唯有再落去买其他野食，经过季季红门口见到佢地咁惨淡嘅情况。其实呢间野虽然唔系好食，但都不致于生意咁差，鬼咩，请左啲咁嘅伙记。其实之后我都有响地厅堂食过一次，以前有个做左好耐嘅女经理冇做，成班职员而家好似乌合之众咁，玩下玩下响度 “扮工”, 啲野又贵又难食。唉，真系祝呢间野好运。